गोरुसिङ्गे–सुपा देउराली सडक जोखिमपूर्ण: यात्रु र स्थानीय त्रास

कपिलवस्तु , चैत्र १८ — गोरुसिङ्गे हुँदै सुपा देउरालीसम्मको सडक खण्ड पछिल्लो समय अत्यन्त जोखिमपूर्ण बन्दै गएको छ। दिनरात अविरल रूपमा गुड्ने टिप्परहरूको अत्यधिक चापका कारण यात्रु मात्र होइन, स्थानीय बासिन्दासमेत त्रसित बन्न पुगेका छन्।

सडकमा गुडिरहेका भारी टिप्परहरूको बिगबिग्गीका कारण सवारी चालकहरूलाई सुरक्षित रूपमा गाडी चलाउन कठिन हुँदै गएको छ। विशेषगरी घुमाउरो मोडहरूमा दुर्घटनाको जोखिम बढेको स्थानीयको गुनासो छ। “कतिबेला कहाँ के हुन्छ भन्ने ठेगानै हुँदैन,” एक स्थानीय चालकले बताए।
यस्तै, एक वर्ष नपुग्दै निर्माण सम्पन्न भएका पिच सडकहरू समेत बिग्रँदै गएको देखिएको छ। अत्यधिक भार बोकेका टिप्परहरूकै कारण सडक चाँडै ध्वस्त बन्दै गएको भन्दै सर्वसाधारणले चिन्ता व्यक्त गरेका छन्।
सडक निर्माणमा गुणस्तरको कमी वा निर्माणपछि आवश्यक अनुगमनको अभाव भएको हो कि भन्ने प्रश्न उठ्न थालेको छ। सम्बन्धित निकायहरू—सडक विभाग, स्थानीय सरकार तथा ट्राफिक प्रहरी—को प्रभावकारी भूमिका नदेखिएको भन्दै स्थानीयवासीले असन्तुष्टि जनाएका छन्।
यदि तौल नियन्त्रण तथा सवारी सञ्चालनसम्बन्धी नियमहरू कडाइका साथ लागू गरिएको भए यस्तो अवस्था आउन नसक्ने जानकारहरू बताउँछन्। जनताको करबाट निर्माण भएका सडक केही व्यक्तिको नाफाका लागि क्षतिग्रस्त हुनु अनुचित भएको उनीहरूको भनाइ छ।
स्थानीयले तत्काल सडकको गुणस्तर परीक्षण गर्न, अत्यधिक भार बोकेका सवारीसाधनमाथि कडाइ गर्न तथा यात्रु सुरक्षालाई प्राथमिकतामा राख्न सम्बन्धित निकायसँग माग गरेका छन्। अन्यथा भविष्यमा ठूला दुर्घटना निम्तिन सक्ने चेतावनी दिइएको छ।
सुरक्षित यात्रा नागरिकको आधारभूत अधिकार भएकाले सम्बन्धित निकाय, जनप्रतिनिधि तथा नागरिक समाज सबैले मिलेर समाधान खोज्नुपर्ने आवश्यकता देखिएको छ।