कपिलवस्तुमा स्कुल भ्यानको ठक्करबाट कक्षा १ का विद्यार्थीको मृत्यु
कपिलवस्तुको बाणगंगा नगरपालिका–४ सिद्धिपुरस्थित होराइजन इङ्लिस बोर्डिङ स्कुलमा एक दुःखद घटना घटेको छ। विद्यालयकै भ्यानको ठक्करबाट कक्षा १ मा अध्ययनरत ७ वर्षीय प्रियान्स खनालको ज्यान गएको छ।
बिहीबार दिउँसो करिब २ बजे स्कुल कम्पाउन्डभित्रको चौरतर्फ हिँडिरहेका बेला लु.प्र.०१–००१ क ०३६३ नम्बरको इभी भ्यानले प्रियान्सलाई ठक्कर दिएको थियो। भ्यान २६ वर्षीय चालक विजय सारुले चलाएका थिए।
ठक्करपछि गम्भीर घाइते भएका बालकलाई तत्काल भैरहवा मेडिकल कलेजमा उपचारपछि चितवन मेडिकल कलेज भरतपुर रिफर गरिएको थियो। तर, राति ११:३८ बजे चिकित्सकले उनलाई मृत घोषणा गरेका थिए।
घटनापछि प्रहरीले आवश्यक अनुसन्धान अगाडि बढाएको छ।
