तिलौराकोट होटेल इन्टरनेसनलद्वारा विपन्न विद्यार्थीलाई शैक्षिक सामग्री वितरण
कपिलवस्तु, २८ बैशाख ।
कपिलवस्तु जिल्लाको बुद्धभूमि नगरपालिका–६ लक्ष्मणपुरस्थित श्री सरस्वती आधारभूत विद्यालयमा अध्ययनरत विपन्न परिवारका विद्यार्थीलाई शैक्षिक सामग्री वितरण गरिएको छ ।
सामाजिक उत्तरदायित्वअन्तर्गत तिलौराकोट होटेल इन्टरनेसनलले विद्यालयमा कक्षा १ देखि ५ सम्म अध्ययनरत १५ जना विद्यार्थीलाई झोला, कपी तथा कलम वितरण गरेको हो ।
विद्यालय परिसरमा आयोजित कार्यक्रममा बुद्धभूमि नगरपालिका–६ का वडा अध्यक्ष एलेन्द्र प्रसाद कुर्मी, वडा सदस्य उमाशंकर चौधरी तथा तिलौराकोट होटेल इन्टरनेसनलका प्रोप्राइटर सुनिल खत्रीले संयुक्त रूपमा सामग्री हस्तान्तरण गर्नुभएको थियो । कार्यक्रमको समन्वय समाजसेवी सिता गिरीले गर्नुभएको थियो ।
शैक्षिक सामग्री पाएपछि विद्यार्थीहरू उत्साहित देखिएका थिए । विद्यालयका प्रधानाध्यापक मिना कुमारी गिरीले सहयोगप्रति आभार व्यक्त गर्दै यस्ता कार्यक्रमले विद्यालयको शैक्षिक वातावरण सुधार गर्न महत्त्वपूर्ण योगदान पुग्ने बताउनुभयो ।
उहाँले विपन्न परिवारका बालबालिकालाई आवश्यक शैक्षिक सामग्री उपलब्ध हुँदा पढाइप्रति उत्साह बढ्ने र शैक्षिक गुणस्तर सुधारमा समेत सकारात्मक प्रभाव पर्ने विश्वास व्यक्त गर्नुभयो । साथै विद्यालयलाई सहयोग गर्ने सबैप्रति धन्यवाद ज्ञापन गर्नुभयो ।
वडा अध्यक्ष एलेन्द्र प्रसाद कुर्मीले शिक्षा क्षेत्रको विकासका लागि सरकारी प्रयाससँगै निजी क्षेत्र र सामाजिक संघसंस्थाको सहकार्य आवश्यक रहेको बताउनुभयो । बालबालिकाको उज्ज्वल भविष्य निर्माणका लागि यस्ता सहयोग निरन्तर हुनुपर्ने उहाँको भनाइ थियो ।
त्यस्तै, तिलौराकोट होटेल इन्टरनेसनलका प्रोप्राइटर सुनिल खत्रीले समाजप्रतिको दायित्वअनुसार विद्यालयका बालबालिकालाई सहयोग गरिएको बताउँदै आगामी दिनमा पनि शिक्षा तथा सामाजिक क्षेत्रमा सहकार्यलाई निरन्तरता दिने प्रतिबद्धता व्यक्त गर्नुभयो ।
