विदेशमा रहेका नेपालीलाई मताधिकार दिने तयारी, निर्वाचन आयोगले पठायो कानुनी सिफारिस

काठमाडौं, कात्तिक २० – कपिलवस्तु दर्पण समाचार

निर्वाचन आयोगले विदेशमा बसोबास गर्ने नेपाली नागरिकलाई मताधिकार दिने उद्देश्यले आवश्यक कानुनी संशोधनका लागि गृहमन्त्रालयलाई औपचारिक सिफारिस पठाएको छ।

आयोगका प्रवक्ता नारायणप्रसाद भट्टराईका अनुसार सरकारले माग गरेको सुझावअनुसार आयोगले मतदाता नामावली ऐन, निर्वाचन अपराध तथा सजाय ऐन, निर्वाचन आयोग ऐन, र प्रतिनिधिसभा निर्वाचन ऐनमा संशोधनका लागि कानुनी धाराहरू प्रस्ताव गरेको हो।

भट्टराईका अनुसार, “गृहमन्त्रालयले कानुनी राय मागेकाले हामीले आवश्यक शब्दावली र धारासहित सिफारिस पठाएका छौं। तर यसको व्यवहारिक कार्यान्वयनका लागि सरकारले अझ तयारी गर्नुपर्नेछ,” उनले भने।

हालका कानुनमा विदेशस्थित नेपालीहरूले कसरी र कहाँबाट मतदान गर्न सक्ने भन्ने प्रावधान स्पष्ट नभएकाले त्यसका लागि नयाँ कानुनी संरचना आवश्यक भएको आयोगको मत रहेको छ।

यससँगै सरकारले चाहेमा अध्यादेशमार्फत कानुन संशोधन गरी विदेशमा रहेका नेपालीलाई मताधिकार दिने बाटो खुला भएको छ।

प्रधानमन्त्री कार्यालय, गृहमन्त्रालय, निर्वाचन आयोग र नीति अनुसन्धान प्रतिष्ठानले संयुक्त रूपमा विदेशमा मताधिकार सुनिश्चित गर्न कानुनी मस्यौदा र नीति निर्देशन तयार गर्दैछन्।

गृहमन्त्रालयका अधिकारीहरूका अनुसार, आगामी प्रतिनिधिसभा निर्वाचन (फागुन २१) मा प्रारम्भिक रूपमा केही छानिएका मुलुकहरूमा परदेशी मतदाता प्रणाली लागू गर्ने सम्भावना अध्ययन भइरहेको छ। तर कुन देशबाट सुरु गर्ने र कुन प्रणाली अपनाउने भन्ने विषयमा अन्तिम निर्णय हुन बाँकी छ।

प्रतिनिधिसभा अहिले विघटित अवस्थामा भएकाले कानुनी संशोधन अध्यादेशमार्फत मात्र सम्भव भएको र त्यसका लागि आयोगको कानुनी राय आवश्यक रहेको मन्त्रालयले जनाएको छ।

🔸 स्रोत: निर्वाचन आयोग, गृहमन्त्रालय
🔸 समाचार: कपिलवस्तु दर्पण