सिद्धार्थ क्याम्पसमा शुल्क वृद्धि विवाद : मासिक र भर्ना शुल्क पुनरावलोकन गर्न विद्यार्थीको माग
कपिलवस्तु । सिद्धार्थ क्याम्पसमा मासिक तथा भर्ना शुल्क वृद्धि गरिएको विषयलाई लिएर विद्यार्थीहरू असन्तुष्ट बनेका छन्। शुल्क वृद्धिको निर्णय पुनरावलोकन गर्न तथा विद्यार्थीहरूसँग आवश्यक छलफल र परामर्श गर्न माग गर्दै विद्यार्थी परिवारले क्याम्पस प्रशासनसमक्ष ज्ञापनपत्र बुझाएका छन्।
ज्ञापनपत्रमा उल्लेख भएअनुसार, क्याम्पसमा विगतमा रु. १,२०० रहेको मासिक शुल्कलाई रु. १,६०० कायम गरिएको तथा रु. ६,००० रहेको भर्ना शुल्कलाई रु. ८,००० कायम गरिएको विषयमा विद्यार्थीहरूले गम्भीर ध्यानाकर्षण जनाएका छन्।
विद्यार्थी पक्षले शैक्षिक संस्थामा शुल्कसम्बन्धी महत्वपूर्ण निर्णय गर्दा विद्यार्थीहरूको आर्थिक अवस्था, शैक्षिक आवश्यकता तथा सम्बन्धित पक्षसँग आवश्यक परामर्शलाई ध्यान दिनुपर्ने बताएका छन्।
ज्ञापनपत्रमा शुल्क वृद्धिको विषयमा पुनरावलोकन गरी विद्यार्थीहरूसँग आवश्यक छलफल तथा परामर्श गर्न क्याम्पस प्रशासनसमक्ष आग्रह गरिएको छ।
विद्यार्थीहरूले आफ्नो अभियान विरोधका लागि मात्र नभई संवाद, पारदर्शिता र विद्यार्थीमैत्री समाधानका लागि भएको बताएका छन्।
विद्यार्थीको मुख्य माग
- मासिक शुल्क वृद्धिको पुनरावलोकन गर्नुपर्ने
- मासिक शुल्क वृद्धिको पुनरावलोकन गर्नुपर्ने
- भर्ना शुल्कबारे पुनः छलफल गर्नुपर्ने
- शुल्क निर्धारणअघि विद्यार्थीहरूसँग परामर्श गर्नुपर्ने
- आर्थिक रूपमा कमजोर विद्यार्थीलाई थप भार नपर्ने व्यवस्था गर्नुपर्ने
अब क्याम्पस प्रशासनले विद्यार्थीहरूको मागलाई कसरी सम्बोधन गर्छ भन्ने विषयमा सबैको ध्यान केन्द्रित भएको छ।
